Xaçmaz rayonunda Aqrar İnnovasiya Festivalı keçirilib

Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Xaçmazda 15-ci Aqrar İnnovasiya Festivalı keçirilib.

Festivalda Kənd Təsərrüfatı Nazirliyinin Elmi-Tədqiqat İnstitutları, Aqroservis, AXA, AKİA, Aqrar Sığorta, Süni Mayalandırma Mərkəzi, Dövlət Toxum Fondu və digər tabeli qurumlar, həmçinin aqrar sahənin müxtəlif istiqamətləri üzrə fəaliyyət göstərən 60-dan çox yerli və xarici şirkət iştirak edib.

Xaçmaz Olimpiya İdman Kompleksinin ərazisində təşkil edilən festivalda fermerlərin, kiçik və orta sahibkarların, aqrar şirkətlərin, eləcə də beynəlxalq təşkilatların və dövlət qurumlarının iştirakı ilə müxtəlif innovativ məhsul və avadanlıqların əyani nümayişi keçirilib.

Festival zamanı innovativ texnologiya və məhsulların nümayişi ilə yanaşı, startap zona, təlim və məlumat sessiyaları baş tutub, aqrar sahənin inkişaf etdirilməsinə hədəflənən prioritet istiqamətlər üzrə təlimlər keçirilib.

Qeyd edək ki, Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə növbəti Aqrar İnnovasiya Festivalının Naxçıvan Muxtar Respublikasında keçirilməsi nəzərdə tutulur.

Nilufər Mustafaqızı, Orxan Qasımov, Agro TV Azerbaijan